Претседателката на Европската комисија, Урсула Фон дер Лајен, во своето годишно обраќање пред Европскиот парламент, познато како „Состојбата на Европската Унија“, нагласи дека ЕУ мора да се ослободи од оковите на консензусот и да започне одлучување со квалификувано мнозинство во клучни области, како што е надворешната политика.
„Токму сега се исцртуваат бојните линии за новиот светски поредок заснован на моќ и Европа мора да се бори за своето место во свет каде големите сили се амбивалентни или непријателски настроени“, рече Фон дер Лајен, додавајќи дека ова е борба за слободна, независна и демократска Европа.
Претседателката потенцира дека, иако ЕУ е мировен проект, денешниот свет е немилосрден, со војни и глобални кризи кои ги чувствуваат Европејците во секојдневниот живот. Таа најави создавање на нов Европски центар за демократска отпорност за борба против дезинформациите и манипулациите кои ја еродираат довербата во демократијата.
Фон дер Лајен најави и Патоказ за заеднички одбранбени проекти, Европски одбранбен семестар до 2030 година, Фонд за конкурентност, зголемување на средствата за истражување и иновации, како и намалување на бирократските трошоци за европските компании.
Таа посочи дека независноста и конкурентноста на Европа се клучни за одбрана, енергетска безбедност и економска моќ, истакнувајќи ја важноста од силен Единствен европски пазар и нови програми за декарбонизација, создавање работни места и зајакнување на енергетската независност на ЕУ.
„Ова е Европа што ја сакам и што мораме да ја заштитиме по секоја цена. Европејците отсекогаш морале да се борат за своите слободи, и денес тоа е исто така наша мисија“, заклучи Фон дер Лајен.
