Кандидатот за градоначалник на Општина Чаир, Изет Меџити, денеска го презентираше еден од најголемите инфраструктурни проекти во општината – целосна реконструкција и трансформација на улицата „Ферид Мурат“.
Проектот, кој опфаќа делница долга еден километар – од улицата „Џон Кенеди“ до кружниот тек „Шипонја“ – е вреден 1 милион евра и се финансира со поддршка од Општина Чаир, Светска банка и Министерството за транспорт и врски.
Со инвестицијата е предвидено комплетно асфалтирање, изградба на две модерни сообраќајни ленти, стандардизирани тротоари, велосипедски патеки, легално уредени паркинг-места, современо улично осветлување и изградба на нов функционален кружен тек кој ќе го олесни протокот на сообраќај.
Работите треба да завршат до март 2026 година, по што жителите на Чаир ќе добијат побезбедна, покомфорна и модерна улица.
„Ова е само еден од доказите дека Чаир чекори силно напред. Нашата визија е да изградиме општина со европски стандарди за живеење“, изјави Меџити.
