Полска воведе ограничувања за воздушниот сообраќај на источната граница со Белорусија и Украина, откако повеќе беспилотни летала влегоа во нејзиниот воздушен простор, соопшти Оперативната команда на полските вооружени сили.
Во текот на вчерашниот ден, со поддршка на авиони од НАТО, Полска собори беспилотни летала за кои се сомневаше дека припаѓаат на Русија – прв познат случај членка на НАТО да отвори оган во услови на војната во Украина.
Агенцијата за контрола на воздушниот сообраќај на Полска соопшти дека ограничувањата стапија во сила на полноќ и ќе важат до 9 декември. Летовите во зоната EP R129 се забранети од зори до самрак, освен за летала со екипаж кои работат според план за лет и одржуваат двонасочна комуникација со властите. Воени летови и летови со посебна намена се ослободени од ограничувањата, а цивилните беспилотни летала имаат целосна забрана 24 часа.
Руското Министерство за одбрана тврди дека нивните беспилотни летала извршиле напади врз воени објекти во западна Украина, но дека не планираат да погодат цели во Полска.
