Александар Трајановски е кандидат на ГРОМ за градоначалник на Град Скопје, Ристо Пенов носител на коалиционата листа!

Александар Трајановски е кандидат на ГРОМ за градоначалник на Град Скопје, додека Ристо Пенов е носител на коалиционата листа. Информацијата Трајановски денеска ја објави на своите профили на социјалните мрежи.

Во продолжение неговата објава на Фејсбук.

Почитувани пријатели, другари и сограѓани на нашето Скопје,

Со голема чест и чувство на одговорност ја прифаќам кандидатурата за градоначалник на Скопје, од коалицијата ГРОМ, ЛДП, Интегра и ПЦЕР.

По 8 години активно работење во Советот на Град Скопје – со бројни иницијативи, предлози и проекти , со средби и размена на искуства со градоначалници од повеќе од 30 европски градови , како и со учество на обуки и семинари за развој и унапредување на локалната самоуправа – денес сум подготвен да понудам конкретни решенија за проблемите со кои секојдневно се соочуваат граѓаните, градот и јавните претпријатија.

Особено ми е чест што како носител на нашата листа ќе биде господинот Ристо Пенов, човек кој веќе остави длабок белег на овој град . Заедно ќе понудиме конкретни и ефикасни решенија за подобар живот во главниот град.

Нашата визија е:

Современо и одговорно Скопје

Отворен град за граѓаните

Ефикасен јавен превоз

Модерно управување со отпадот

Почит и соработка со сите општини

Решавање на реалните проблеми на сите граѓани

Заедно можеме да изградиме Скопје какво што заслужуваме – модерен, функционален и жив град за сите нас!