Под мотото „Спортот како национален идентитет и визија за иднината“, во Скопје се одржа Првиот Регионален спортски самит „Скопје 2025“, на кој Македонија се покажа како центар на регионалната соработка во спортот.
На самитот, кој се реализира под покровителство на Министерството за спорт, учествуваа врвни спортски и државни функционери од регионот. Присутните имаа можност да дискутираат за тоа како спортот може да ги обедини луѓето, државите и културите и да придонесе за здрава, современа и просперитетна заедница.
На отворањето присуствуваа вицепремиерот и министер за транспорт и врски, Александар Николовски, како и спортската легенда Горан Пандев, кој ја сподели својата инспиративна спортска приказна.
Првиот панел насловен „Како спортот ја обликува иднината на Балканот: Преку соработка до успех“ ги обедини министрите за спорт од Србија и Црна Гора, Зоран Гајиќ и Драгослав Шќекиќ, заедно со македонските претставници, со цел да се промовира регионалната соработка и заедничка визија за иднината на спортот на Балканот.
Министерот за спорт, Борко Ристовски, истакна:
„Голема благодарност до сите кои беа дел од првиот регионален спортски самит Скопје 2025. Горди сме што ваков настан по прв пат се случува во Македонија токму под покровителство на Министерството за спорт! Покажавме дека имаме капацитет за обединување на регионот и промоции на политики кои можат да направат промени во спортот.“
Самитот „Скопје 2025“ е платформа за размена на искуства, градење нови партнерства и конкретни политики кои ќе ја унапредат спортската сцена во регионот.
Видеото може да го погледнете тука
