Американската амбасада во Приштина денеска објави дека САД на неопределено време го суспендираат планираниот Стратешки дијалог со Косово, поради загриженост од дејствијата на техничката влада кои, според Вашингтон, ги зголемиле тензии и нестабилноста во земјата.
„Овие околности ја ограничуваат можноста на Соединетите Американски Држави продуктивно да соработуваат со Косово на заедничките приоритети,“ се наведува во соопштението.
САД остануваат посветени на заедничките интереси со косовскиот народ, а односите, како што нагласуваат, се темелат врз заедничка цел – зајакнување на мирот и стабилноста како основа за меѓусебен економски просперитет.
Амбасадата во Приштина прецизира дека неодамнешните постапки и изјави на техничкиот премиер Албин Курти претставуваат предизвик за напредокот што бил постигнат со години.
„Стратешкиот дијалог беше замислен да ги зајакне економските и дипломатските врски за добробит на американскиот и косовскиот народ. Се надеваме дека во иднина ќе можеме да ги продолжиме овие напори кога ќе има соодветни услови,“ се наведува во соопштението на амбасадата.
САД додаваат дека веруваат дека оваа цел останува приоритет и за граѓаните на Косово.
