Турските власти уапсија претседател на еден округ во Истанбул и уште 47 службеници поради наводи за корупција, што се толкува како дел од поширока кампања против главната опозициска партија во земјата.
Државната агенција „Анадолија“ објави дека апсењата се извршени по налог на главниот обвинител на Истанбул, во рамки на истрага за изнуда, поткуп, проневера и местење тендери во округот Бајрампаша.
Градоначалникот на Бајрампаша, Хасан Мутлу, ги отфрли обвинувањата, нарекувајќи ги „политички операции и неосновани клевети“. Тој преку социјалните мрежи порача дека заедно со жителите ќе се спротивстави на, како што ги нарече, неправедните постапки.
Во последните месеци, десетици функционери од Републиканската народна партија (ЦХП) и стотици општински службеници беа уапсени под сомнеж за корупција, меѓу нив и градоначалникот на Истанбул, Екрем Имамоглу, кој важи за главен политички ривал на претседателот Реџеп Тајип Ердоган. Неговото апсење предизвика масовни протести низ целата земја.
Од ЦХП обвинуваат дека акциите на власта имаат цел да ја ослабат опозицијата и да го расчистат патот за нов петгодишен мандат на Ердоган, додека властите возвраќаат дека судовите се независни и дека станува збор за законски постапки.
Во понеделник Судот треба да одлучи дали ќе биде поништен Конгресот на ЦХП од 2023 година – можен потег кој би ја променил партиската структура и дополнително би ја ослабил опозицијата.
