Источниот брег на рускиот полуостров Камчатка денеска беше погоден од силен земјотрес со магнитуда од 7,4 степени според Рихтеровата скала, соопштија Европско-медитеранскиот сеизмолошки центар (EMSC) и Американската геолошка служба (USGS). Епицентарот бил на околу 111 километри источно од градот Петропавловск-Камчатски, на длабочина од околу 40 километри.
Земјотресот предизвика вознемиреност кај населението, а локалните власти ги активираа безбедносните протоколи. Гувернерот на Камчатка, Владимир Солодов, објави предупредување за можна опасност од цунами за брегот на Камчатка и Курилските острови, додека службите за итни случаи се ставија во готовност за евакуација.
Pacific Tsunami Warning Center на Хаваи првично издаде аларм за можни штетни бранови во радиус од 300 километри, но подоцна го повлече, наведувајќи дека нема реална закана. Во Јапонија, исто така, не беше издадено предупредување за цунами.
Руската геофизичка служба, пак, пријави нешто пониска магнитуда од 6,3 степени, со епицентар на 123 километри од Петропавловск-Камчатски и длабочина од 46,8 километри. Разликата во проценките меѓу локалните и меѓународните институции дополнително ја нагласува сложеноста на настанот.
Иако досега нема извештаи за жртви или поголеми штети, стравот кај жителите е голем поради потсетувањето на масивниот земјотрес од 8,8 степени што го погоди истиот регион на 29 јули оваа година, предизвикувајќи цунами бранови до 4 метри. Властите продолжуваат со проценки и следење на можните афтершокови.
