Црквата „Свети Константин и Елена“ на улицата „Македонија“ во центарот на Скопје ќе биде осветена на 28 септември, со почеток во 08:30 часот, информираше Скопската епархија на Македонската православна црква (МПЦ). Осветувањето ќе го изврши Поглаварот на МПЦ, г. г. Стефан, во сослужение на архиереи, а меѓу поканетите се државниот врв, дипломатскиот кор, стопанственици, претставници на локалната самоуправа, медиуми и верници.
Изградбата на храмот започна во 2012 година и траеше 13 години поради финансиски предизвици. Средства се собираа преку донаторски конференции, а помош даваа политичари, бизнисмени и владици. Особена поддршка за изработката на фрескоживописот обезбеди Кочо Анѓушев, со лична донација и преку компаниите во негова сопственост, по јавниот повик на МПЦ за општествено одговорни личности.
Црквата ја градеше компанијата „Бетон“, а приватната болница „Ремедика“ го презеде преостанатиот долг од околу 3,5 милиони евра за да се заврши изградбата без финансиски тешкотии.
Храмот во текот на годините беше и предмет на контроверзии: во 2013 година имаше протести пред Општина Центар, а судската постапка заврши во септември 2020 година со пресуда за поранешниот премиер Никола Груевски.
Со завршувањето на изградбата и осветувањето, црквата „Свети Константин и Елена“ се очекува да стане значаен духовен и културен објект во центарот на Скопје.
