Две необични фигури со хуманоиден изглед, претставени во Мексико во 2023 година, повторно ја возбудија јавноста поради најновите анализи кои укажуваат дека нивните отисоци од прсти не се човечки. Телата, со издолжени черепи и раце со три прста, предизвикуваат поделени мислења меѓу научниците и јавноста.
Американскиот адвокат Џошуа Мекдауел, поранешен обвинител од Колорадо, заедно со тројца независни форензичари, извршија преглед на едно од телата наречено „Марија“. „Ова не се традиционални човечки отисоци. Нема јасни линии, петли или вртлози како кај човекот“, изјави тој за „Дејли Мејл“. Сепак, Мекдауел предупреди дека е рано за конечни заклучоци, бидејќи рамноста на отисоците може да се должи и на специфичниот начин на зачувување во дијатомски седимент.
Скептиците, пак, сметаат дека телата можеби се вештачки создадени од комбинација на човечки и животински коски, хартија и лепак. Форензичкиот археолог Флавио Естрада и историчарот Кристофер Хини укажуваат дека издолжените черепи би можеле да бидат резултат на предколумбовска пракса на обликување на главата.
Иако анализата на отисоците од прсти отвори нови дилеми, засега нема потврден доказ дека станува збор за вонземјанско потекло. Филмска екипа која подготвува документарец тврди дека рендгенските снимки укажуваат на автентичност, но посочуваат и можност за генетска манипулација, а не за „живот од вселената“.
