Црквата „Свети Константин и Елена“ на улицата „Македонија“ во центарот на Скопје ќе биде свечено осветена на 28 септември, информира Скопската епархија на Македонската православна црква. Осветувањето ќе го изврши Поглаварот на МПЦ, г. г. Стефан, во сослужение на архиереи, а меѓу поканетите се државниот врв, дипломатскиот кор, стопанственици, претставници на локалната самоуправа, медиуми и верници.
Изградбата на храмот започна во 2012 година и траеше 13 години поради финансиски предизвици. Средствата се собираа преку донаторски конференции, а поддршка даваа политичари, бизнисмени и владици. Особена помош за изработката на фрескоживописот обезбеди Кочо Анѓушев преку лична донација и преку компаниите во негова сопственост.
Црквата ја градеше компанијата „Бетон“, додека приватната болница „Ремедика“ го презеде преостанатиот долг од околу 3,5 милиони евра за да се заврши изградбата без финансиски тешкотии.
Храмот во текот на годините беше и предмет на контроверзии, вклучително и протести во 2013 година, а судската постапка се заврши во септември 2020 година. Со завршувањето и осветувањето, „Свети Константин и Елена“ се очекува да стане значаен духовен и културен објект во центарот на Скопје.
