Република

ВМРО-ДПМНЕ ја поднесе советничката листа во Пробиштип, Наунова носител – Тоневски кандидат за градоначалник

Во рамки на подготовките за локалните избори 2025, ВМРО – ДПМНЕ официјално ја поднесе својата советничка листа во Пробиштип. Листата ќе ја предводи професорката Александра Наунова, а кандидат за градоначалник е Тони Тоневски. Наунова е професор по англиски јазик во подрачното основно училиште „Никола Карев” и советник во Советот на градот.

Александра Наунова има богато искуство во меѓународни проекти и образовни иницијативи. Таа соработувала со Мировниот корпус и директно учествувала во повеќе интернационални училишни проекти, носејќи нови идеи и практики во локалното образование.

Покрај учеството во образовни проекти, Наунова е активен организатор на училишни и хуманитарни настани, со што ја промовира социјалната одговорност, волонтерството и меѓународната соработка меѓу младите.

Нејзината посветеност кон образованието и развојот на заедницата ја прави важен столб на локалниот совет и доверлив партнер во градењето на современа и инклузивна општинска политика.

Од локалниот комитет на партијата посочуваат дека станува збор за комбинација на младешки елан и докажано искуство во работењето. Кандидатите, како што беше нагласено, ќе се залагаат за решавање на проблемите во секое маало, населба и село во општината, со фокус на подобрување на локалната инфраструктура, развојни проекти и зголемена транспарентност во работењето.

СДСМ на 2 септември ја потврди повторната кандидатура на актуелниот градоначалник Драган Анастасов – Ладич, кој влегува во трка за свој трет последователен мандат. Рокот за доставување на изборен список на партиите до ДИК заврши на 11 септември, додека партијата сè уште ја нема објавено својата советничка листа.

Во последните неколку дена, партиите почнаа да ги официјализираат своите советнички листи. Првиот круг на локалните избори е закажан за 19 октомври, а доколку ниту еден од кандидатите не обезбеди мнозинство, вториот круг ќе се одржи на 2 ноември.

Република

БУГАРИ УАПСЕНИ ЗА КРАЖБА НА НАРОДНИ НОСИИ ВО ДЕМИР ХИСАР

Тројца бугарски државјани се уапсени вчера во Демир Хисар под сомнение дека украле и незаконски изнесувале делови од македонски народни носии, кои се класифицирани како културно наследство и под посебен режим на заштита.

Полицијата ги привела А.К. (44) и К.К. (48) во патничко возило „фолксваген голф“ со бугарски регистарски таблици, додека В.Г. (50) бил затекнат во комбе „пежо боксер“, исто така со бугарски ознаки. При прегледот на возилата биле пронајдени поголеми количини на делови од народни носии, за кои осомничените не можеле да обезбедат документи за легално потекло.

Етнолог од Музејот во Битола извршил стручна процена и утврдил дека станува збор за автентични македонски традиционални носии, кои според законот не смеат да се продаваат или прометуваат без дозвола од надлежните институции.

Осомничените се задржани во полициска станица, а по целосното документирање на случајот и во координација со јавен обвинител, против нив ќе биде поднесена кривична пријава за кражба и незаконско изнесување културно наследство или природни реткости.

Случајот го отвора прашањето за зачувување на македонското културно наследство и за контрола на прометот со традиционални артефакти, особено во услови кога се бележат обиди за нелегално изнесување во странство.

Република

Утре две тетовски села ќе бидат без струја

Поради планирани технички зафати, утре (10 декември 2025) две села во тетовскиот регион ќе останат без електрична енергија во период од 09:00 до 14:00 часот.

Според најавата, прекин ќе има во делови од селото Џрпчиште, особено кај објектите што се наоѓаат во близина на млекарницата „Алпи“.

Исто така, без струја ќе бидат и делови од селото Теарце, поточно подрачјето во близина на полициската станица.

Од надлежните апелираат жителите да ги планираат своите активности согласно најавениот прекин.

Република

Јорданов со апел до граѓаните по вандализмот во центарот на Штип

Градоначалникот на Штип, Иван Јорданов, остро реагираше по серијата инциденти во централното градско подрачје, каде беа исечени новогодишни сијалици, уништени садници и оштетена урбана опрема. Тој оцени дека овие дејствија претставуваат сериозен удар врз заедничкото добро и вложувањата на општината.

„Сведоци сме на слики кои никој од нас не сака да ги види. Ваквите постапки не се само вандализам, туку ја нарушуваат сликата на градот и го поткопуваат трудот на сите кои работат за поуредено урбано окружување,“ истакна Јорданов.

Тој упати апел до СВР Штип да преземе мерки и санкции кон сторителите, потенцирајќи дека ваквото однесување ја загрозува безбедноста и ја понижува заедницата.

Јорданов ги повика и граѓаните на повисока свест и одговорност: „Нашиот град може да биде онаков каков што го посакуваме само ако секој од нас покаже грижа. Само заеднички можеме да го сочуваме јавниот простор и да создадеме средина во која сите се чувствуваме горди да живееме.“

„Нашиот град е наш дом и наша должност е да го чуваме,“ заклучи градоначалникот, охрабрувајќи ги жителите да реагираат доколку забележат уништување и да придонесат за заштита на градот.