Македонија

Безбедно управување со велосипеди и е-тротинети – порака на Европската недела на мобилност

Републичкиот совет за безбедност на сообраќајот на патиштата (РСБСП) ги започна активностите во рамки на кампањата по повод „Европската недела на мобилност 2025“, што традиционално се одржува секоја година од 16 до 22 септември.

Оваа година, фокусот е ставен на безбедноста на велосипедистите и возачите на електрични тротинети. Во соработка со Министерството за внатрешни работи и останатите партнери, РСБСП ќе реализира низа превентивно-едукативни настани, со цел учесниците во сообраќајот подобро да се запознаат со законските правила и начините за безбедно управување со овие превозни средства.

Велосипедите и е-тротинетите се сè почесто дел од алтернативниот транспорт во урбаните средини, а со тоа и важен сегмент на одржливата мобилност. Затоа, РСБСП ја поддржува основната порака на Европската недела на мобилност – промоција на модерен, безбеден и еколошки одржлив урбан транспорт.

„Ги повикуваме сите граѓани активно да се вклучат во настаните, да се информираат и да придонесат за побезбеден и похуман сообраќај во нашите градови. Заеднички да ја испратиме пораката дека почитувањето на правилата значи почитување на животот,“ порачуваат од Републичкиот совет за безбедност на сообраќајот на патиштата.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.