Инструктор на „Бритиш Ервејс“ со плата од 170.000 фунти фатен во кражба на сендвичи

Инструктор по летање на „Бритиш Ервејс“, со годишна плата од околу 170.000 фунти, е фатен како краде храна и пијалоци од самопослужната кафетерија во седиштето на компанијата во Вотерсајд, во близина на лондонскиот аеродром Хитроу, пренесе AviationATO h.

Пилотот, кој повеќе од две децении работи во компанијата и обучува идни капетани за авионот „Ербас А380“, бил снимен од безбедносните камери како зема сендвичи и пијалоци, без да ги плати на каса. И покрај тоа што однесувањето било повторувано, по разговор со менаџментот добил само опомена, без сериозни дисциплински мерки.

Извештајот дополнително открива дека и неколку високи менаџери биле фатени во слични ситуации и исто така добиле предупредувања. Благиот одговор предизвика остри реакции, бидејќи персоналот од понизок ранг, како кабинскиот екипаж кој заработува помалку од 30.000 фунти годишно, би се соочил со отпуштање за исто дело.

Во меѓувреме, „Катар ервејс“ постапи построго и отпушти член на кабинскиот екипаж по потврден случај на кражба за време на лет на релацијата Доха–Сингапур. Инцидентот се случил на 28 март годинава, кога патник во бизнис класа го оставил телефонот во тоалетот, а подоцна уредот бил пронајден во хотел за екипаж во Сингапур, па потоа префрлен на Филипините.