Спорт

Нова сезона на Лигата на шампиони стартува со дерби натпревари и огромни премии

Вечерва започнува новата сезона на фудбалската Лига на шампиони, по втор пат во новиот формат воведен минатата година, а титулата ја брани Пари Сен Жермен.

Наместо досегашните осум групи со по четири екипи, воведена е лигашка фаза со 36 клубови. Секој тим ќе одигра осум натпревари против ривали од четири различни шешири, што овозможува повеќе директни дуели меѓу европските гиганти уште во првата фаза. Реал Мадрид ќе се сретне со Ливерпул и Манчестер Сити, додека ПСЖ ќе игра против Барселона и Баерн.

Првите осум екипи по завршување на лигашката фаза директно ќе се пласираат во осминафиналето, додека следните 16 ќе играат во плејофот. Стартот на натпреварувањата носи дерби дуели: Челзи гостува кај Баерн, ПСЖ игра против Аталанта, Ливерпул го пречекува Атлетико Мадрид, а во четврток Њукасл ќе се сретне со Барселона, додека Манчестер Сити игра против Наполи.

Буџетот на новата Лига на шампиони изнесува 2,5 милијарди евра. Секој клуб учесник првично добил 18,6 милиони евра, додека дополнителни 835 милиони евра се поделени врз основа на маркетингот и историскиот рејтинг на клубовите. Средствата за освоени бодови изнесуваат 914 милиони евра, при што секој освоен бод носи 700 илјади евра, а победата 2,1 милион евра.

Пласманот во осминафиналето носи 11 милиони евра, четвртфиналето 12,5 милиони, полуфиналето 15 милиони, а финалето 18,5 милиони евра. Победникот добива дополнителни 6,5 милиони евра, како и 4,5 милиони за настап во Европскиот Суперкуп. Така, освојувачот на Лигата на шампиони може да инкасира скоро 90 милиони евра само од премии, без да се вклучат ТВ права, спонзорства и приходи од влезници.

Финалето на сезоната е закажано за 30 мај 2026 година на Пушкаш Арената во Будимпешта.

Спорт

Бразилецот Да Силва потпиша за Вардар – новитет во редовите на скопскиот гигант

Ракометниот клуб Вардар повлече значаен стратешки потег во пресрет на клучниот дел од сезоната. Жоао Педро да Силва (30) е новиот бек на линијата на „вардарци“. Неговиот ангажман, кој ќе трае две и пол сезони, е потврда за долгорочната визија на управата за враќање на врвот.

Стручниот штаб во Да Силва гледа профил на играч кој носи брзина, интелигентни решенија и потребна разновидност во офанзивата. Со оглед на тешките предизвици во Лига Европа кои следуваат во февруари и март, како и домашниот плеј-оф, Бразилецот доаѓа како клучно засилување во вистински момент. Неговата промоција во Скопје е закажана за почетокот на идната година, кога ќе бидат финализирани и последните детали од соработката.

Спорт

Лоши вести за македонскиот ракомет

Европската ракометна федерација (ЕФХ) го одреди новиот формат за Лигата на шампионите, а македонскиот ракометен шампион нема директно учество во најквалитетното натпреварување туку тоа ќе може да го оствари со барање за вајлд-карта.

Извршниот комитет го потврди системот, а рангирањето на федерациите е според резултатите од сезоните 2022/23, 2023/24 и 2024/25. На првите десет места се рангирани следните федерации: Германија, Шпанија, Франција, Данска, Полска, Унгарија, Романија, Португалија, Хрватска и Норвешка, а тоа значи дека овие држави имаат една загарантирано место во Лигата на шампионите. Овие федерации можат да побараат и по две вајлд карти, а ЕХФ ќе додели осум „специјални покани“.

Во натпреварувањето од следната сезона ќе бидат 24 екипи, поделени во шест групи по четири, а дванаесет од нив ќе се пласираат во главната рунда. Другите 12 екипи ќе продолжат во 1/16 финалето од Европската лига.

Спорт

По натпреварот – во полиција: Манасков приведен по напад врз тренерот на Охрид

Суперлигашкото дерби меѓу Пелистер и Охрид заврши со победа за домашниот тим (29-25), но вистинската драма се случи по последниот судиски свиреж, кога спортската сала „Билјанини Извори“ се претвори во арена на неспортски инциденти.

Шокантни сцени го обележаа традиционалното поздравување меѓу играчите. Ракометарот на Пелистер, Дејан Манасков, (33) – член на битолскиот тим, физички го нападна Крсте Андоновски, еден од помошниците во стручниот штаб на Охрид, предводен од Борис Ројевиќ.

СВР Охрид веднаш реагираше. Портпаролот Стефан Димоски потврди:

„На 14.12.2025 година во 20.20 часот, во СВР Охрид приведен е Д.М. (33) ракометен играч од Скопје, член на ракометен клуб од Битола. Тој, по завршување на ракометен натпревар […] при меѓусебното поздравување на играчите, физички го нападнал К.А. помошен тренер на домашниот-охридскиот ракометен клуб. По целосно расчистување на настанот, против напаѓачот ќе биде поднесена соодветна пријава.“

Хаосот не запре во салата. Според извештаите, ракометарите на Пелистер, во налет на бес, целосно ја демолирале соблекувалната на гостинскиот тим.

Атмосферата дополнително се вжешти на улиците на Охрид, каде навивачката група на Пелистер, „Чкембари“, била вклучена во физички пресметки, напаѓајќи локални охриѓани во самиот центар на градот.

Овој инцидент фрла мрачна сенка врз спортскиот дух и бара итна реакција од ракометната федерација. Се очекуваат жестоки казни за неспортското однесување, како на теренот, така и надвор од него.