Економија

По преговорите во Мадрид, постигнат договор за TikTok

Кинескиот претставник за меѓународна трговија Ли Ченганг денеска потврди дека Пекинг и Вашингтон постигнале рамковен договор за сопственоста над социјалната мрежа TikTok.

„Основен рамковен консензус е постигнат“, изјави Ченганг, прецизирајќи дека договорот произлегол од трговските преговори што изминатиот викенд се одржаа во Мадрид.

Оваа средба беше четврта рунда во тековните трговски разговори меѓу двете земји откако американскиот претседател Доналд Трамп започна царинска војна со Кина во април.

Американскиот министер за финансии, Скот Бесент, најави дека во наредните недели ќе се одржи и петта рунда преговори.

Прашањето за TikTok е една од клучните точки на несогласување меѓу САД и Кина, особено околу заштитата и управувањето со податоците на американските корисници. Спорот започна уште за време на администрацијата на поранешниот претседател Џо Бајден, која усвои закон што предвидува забрана на TikTok во САД доколку матичната компанија „БајтДенс“ (ByteDance) не го продаде контролниот удел.

Економија

Божиновска: Нема енергетска криза, државата има резерви од мазут!

Граѓаните нема да почувствуваат никакви прекини во снабдувањето со топлинска енергија, иако ЕСМ побара прогласување кризна состојба. Министерката за енергетика, Сања Божиновска, денеска на брифинг со новинарите порача дека државата има доволно резерви на мазут за да ги покрие потребите.

Барањето за кризна состојба ќе се разгледува на утрешната владина седница, но Божиновска нагласи дека тоа е технички чекор за да се активираат државните резерви. Причина за ова е триесетдневната неможност за редовна набавка на мазут од Грција поради тамошните протести.

„Нема да има никаква криза. Постои мазут во државата – ако не го земат од Грција, ЕСМ ќе го земе од државните резерви. За граѓаните ова нема да значи апсолутно ништо“, истакна министерката.

Економија

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,18% во однос на одлуката од 19.12.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,00 ден/лит.

Малопродажната цена на ЕУРОДИЗЕЛ (Д-Е V) не се менува.

Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.

Малопродажната цена на Мазутот М-1 НС се намалува за 0,028 ден/кг и сега ќе изнесува 32,607 ден/кг.

Од 23.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 70,00 (денари/литар)

Моторен бензин ЕУРОСУПЕР БС – 98 72,00 (денари/литар)

Дизел гориво ЕУРОДИЗЕЛ БС (Д-Е V) 64,50 (денари/литар)

Масло за горење Екстра лесно 1 (ЕЛ-1) 63,50 (денари/литар)

Мазут М-1 НС 32,607 (денари/килограм)

Економија

МБИ10 во пораст од 0,23%, без активности на обврзничкиот пазар

Изготвен од Илирика Инвестментс АД Скопје врз основа на официјални податоци од Македонска берза.

На берзанската сесија од 22 декември 2025 година, индексот МБИ10 порасна за 0,23%, достигнувајќи ниво од 10.114,76 поени, додека индексот ОМБ остана непроменет на 129,44 поени . Вкупниот дневен промет на берзата изнесуваше 90,79 милиони денари, со доминантно учество на Комерцијална банка, Алкалоид и Македонијатурист, кои го водеа тргувањето и го зголемија вкупниот обем на пазарот во однос на претходниот ден.

Најтргувани хартии од вредност

● Комерцијална банка АД Скопје (KMB) – 4.949.390 денари

● Алкалоид АД Скопје (ALK) – 4.914.120 денари

● Македонијатурист АД Скопје (MTUR) – 77.490.000 денари (блок-зделка)

Топ добитници

● АЛТА Банка АД Битола (ALTA) +2,78%

● Комерцијална банка АД Скопје (KMB) +0,07%

● Алкалоид АД Скопје (ALK) +0,28%

Топ губитници

● Макпетрол АД Скопје (MPT) –0,69%

Обврзнички пазар

Во текот на сесијата не беа реализирани трансакции со државни или корпоративни обврзници. Цените на државните обврзници од сериите Денационализација 15–23 останаа непроменети, а индексот ОМБ се задржа на 129,44 поени.

Тргувањето на Македонската берза на 22 декември 2025 година се карактеризираше со висок вкупен промет од 90,79 милиони денари, главно поради реализираната блок-зделка со акциите на Македонијатурист .Индексот МБИ10 забележа раст од 0,23%, поддржан од Комерцијална банка и Алкалоид, додека Макпетрол беше меѓу малкуте хартии со ценовен пад. Обврзничкиот пазар остана неактивен, а целокупната пазарна динамика укажува на стабилно тргување во последната недела пред празниците.