Претседателот на Украина, Володимир Зеленски, денес ја осуди Русија за продолжувањето на воените напади врз цивилни објекти и инфраструктура, истакнувајќи дека Москва се однесува без чувство на последици.
Во текот на ноќта, Русија извршила серија брутални ракетни и воздушни напади врз Запорожје, зафатувајќи обични домови и градска инфраструктура, при што бројот на повредени се зголемил, а има и загинати. Утрината бил извршен нов напад со дрон врз цивилен логистички центар во Киевската област, без никаква воена цел, што Зеленски го оцени како намерен удар врз украинскиот бизнис.
Денеска, удар го погоди центарот на Харков, таргетирајќи универзитетски објекти, вклучително и Националниот универзитет за фармација. Русија продолжува да користи управувани бомби врз заедници во региите Суми, Харков и Донецк, а напади со FPV дронови се регистрирани во Запорожје. Херсон е под постојано артилериско гранатирање.
Зеленски нагласува дека Русија може да си дозволи овие напади бидејќи не чувствува сериозни економски или политички последици. „Додека Русија не почувствува вистински загуби, особено економски, ќе продолжи да избегнува вистинска дипломатија и завршување на војната“, рече тој.
Претседателот на Украина повика светот, вклучително Европа, САД, Г7 и Г20, да одговори на секој напад со силни санкции, тарифи и заштита на животот на цивилите.
