Заменик-шефот на рускиот Совет за безбедност, Дмитриј Медведев, предупреди дека воспоставувањето зона на забрането летање над Украина и соборувањето на руски беспилотни летала од страна на НАТО би значело директна војна меѓу Алијансата и Русија, пренесе „Анадолија“.
„Спроведувањето на оваа провокативна идеја на Киев и неговите поддржувачи за забранета зона над Украина би значело само едно – војна меѓу НАТО и Русија. Да ги наречеме работите со вистинското име“, напиша Медведев на Телеграм.
Тој ја коментираше иницијативата „Источна гарда“ на генералниот секретар на НАТО, Марк Руте, објавена во саботата, која предвидува распоредување опрема на границите со Белорусија, Русија и Украина.
Медведев исто така ја осуди можноста за користење на замрзнатите руски средства во форма на заем за Украина, нарекувајќи го тоа „кражба“. Тој предупреди дека Русија ќе ги гони земјите и функционерите на ЕУ „со сите можни средства и до крајот на времето“.
Осврнувајќи се на изјавите на австриската министерка за надворешни работи Беате Мајнл-Рајзингер, која предложи мировни разговори меѓу Русија и Украина врз основа на австриската неутралност, Медведев потсети дека таа пред само два месеци се залагала за влез на нејзината земја во НАТО. „Беате се отрезни и е многу исплашена“, додаде тој.
