Француската жандармерија денес распореди 24 нови оклопни возила „Кентаур“ (Centaure) за време на протестите низ земјата. Името на возилото потекнува од митолошкото суштество половина човек, половина коњ, а новиот апарат е дизајниран да биде безбеден, робустен и одвраќачки, но без агресивен изглед.
Производителот SoFrame од Алзас информира дека возилото тежи 14,5 тони и има оклоп STANAG 4569 Класа 2, кој го штити од куршуми од 7,62 мм и од фрагменти од мини. Опремено е со мотор од 330 КС и може да издржи патување до 500 километри. Димензиите се 3.820 mm x 2.940 mm x 7.500 mm, а капацитетот изнесува до 10 лица.
„Кентаур“ може да биде вооружен со топ FN MAG 58 со далечинско управување и автоматски фрлач на гранати со 30 куршуми. За контрола на толпата користи топ со солзавец, а термалната камера овозможува откривање на растојание до 9 км. Системот Pilar V открива од каде се пука, додека предната хидраулична „вилушка“ поместува пречки до 3,5 тони.
Возилото е модуларно и може да се опреми со радар, беспилотни летала, уреди за блокирање на сигнали и друга специјализирана опрема, што го прави моќна алатка за справување со немири и заштита на полицијата во текот на протестите.
