Независниот кандидат за градоначалник на Струга, Менди Ќира, на прес-конференција ја презентираше својата визија и приоритети за развој на општината, ветувајќи фер и граѓанска кампања – без навреди и лични напади кон политичките опоненти.
„Не сакам да се враќам назад да зборувам за минатото. Граѓаните знаат за тоа. Ние ќе работиме за иднината и ќе бараме поддршка за иднината. Ќе зборуваме што ќе направиме ние, а не што направиле тие,“ нагласи Ќира.
Тој ги повика управителите на јавните претпријатија и училиштата да престанат со, како што рече, притисоци врз вработените:
„Имаме информации дека има притисок вработените да се занимаваат со политика. Се знае кој ќе биде градоначалник од 19 октомври и овие институции треба да се деполитизираат,“ изјави независниот кандидат.
Доколку ја добие довербата од граѓаните, Ќира најави неколку клучни проекти: проширување на патот Мороишта – Струга, изградба на подземни паркинзи, замена на азбестните цевки од водоводната мрежа, решавање на проблемот со кучињата скитници, подобрување на уличното осветлување и уредување на плажите.
