Рускиот претседател Владимир Путин изјави дека повеќе од 700.000 руски војници се распоредени на „линијата на контакт“ во Украина, каде што Москва со месеци спроведува офанзивни акции и постигнува предност во некои сектори. Изјавата ја даде за време на состанок со парламентарните претставници.
Откако пред повеќе од три и пол години започна големата офанзива против Украина, Русија мобилизираше значајни човечки и материјални ресурси, и при тоа претрпе големи загуби, според проценките на независните медиуми.
„Сите ги знаат моите чувства кон оние кои се борат на фронтот, ги ризикуваат своите животи и ги даваат своите животи… нивните роднини и оние кои се враќаат од фронтот, секако, мора да ги поддржиме“, рече Путин.
Тој се осврна и на предлозите за воведување квота за учесниците во војната во властите, нагласувајќи дека изборот на луѓе не треба да се базира на пол, професија или друга припадност, туку на лични карактеристики и лојалност кон татковината.
Путин исто така најави дека Русија постигнала значајни успехи во домашното производство на авионски мотори. Новиот мотор PD-14, според него, ги надминува светските стандарди и е производ кој Русија го нема направено од крајот на 1980-тите години. „Само четири земји произведуваат мотори слични на PD-14, вклучувајќи ја и Русија. Тоа е наша конкурентска предност во реалниот сектор на економијата“, додаде тој.
