Нетанјаху: „Монструозна и голема лага“
Израелскиот премиер Бенјамин Нетанјаху остро ги отфрли онлајн теориите на заговор според кои Израел наводно е поврзан со убиството на американскиот политичар Чарли Кирк, нарекувајќи ги „монструозна и голема лага“.
„Јозеф Гебелс, нацистичкиот министер за пропаганда, рече дека колку е поголема лагата, толку побрзо се шири. Некој измисли монструозна голема лага – дека Израел има врска со ужасното убиство на Чарли Кирк. Тоа е лудо, лажно и скандалозно“, изјави Нетанјаху во видео порака објавена на платформата X, пренесе Times of Israel.
Премиерот потсети дека Кирк бил познат по својата поддршка за Израел, нагласувајќи дека повеќепати разговарале и дека неодамна лично го поканил во посета на земјата. „Го поздравував неговото различно гледиште одвреме-навреме, бидејќи тоа беше суштината на Чарли – суштина на слободна земја. Знаев дека неговите предлози секогаш доаѓаат од срце, од љубовта кон Израел и кон еврејскиот народ“, рече Нетанјаху.
Тој обвини дека ширењето на ваквите гласини можеби е мотивирано од опсесија или финансирано од Катар. „Наместо лаги, Чарли Кирк заслужува почит“, додаде Нетанјаху.
