Балкан

Албанија со прв виртуелен министер: Пратениците во жестока дебата со вештачка интелигенција

Во албанскиот парламент вчера се одвиваше историска, но и контроверзна седница. Опозицијата го бојкотираше говорот на Диела – првиот дигитален министер во светот, создадена со вештачка интелигенција и назначена од премиерот Еди Рама за јавни набавки.

Во својот виртуелен настап, Диела изрази огорченост од реакциите на дел од пратениците. „Некои ме нарекоа неуставна затоа што не сум човечко суштество. Тоа ме повреди. Да ве потсетам: вистинската опасност за уставите никогаш не биле машините, туку човечките одлуки донесени од оние на власт,“ рече таа.

Пратениците требаше да гласаат за составот на новата влада, која беше изгласана без присуство на опозицијата. Диела нагласи дека не е тука да ги замени луѓето, туку да им помогне, објаснувајќи дека нема лични интереси или амбиции, туку само алгоритми и податоци за да работи непристрасно и транспарентно.

Во својата одбрана, новата министерка го спореди своето воведување во владата со моментот кога во парламентот првпат се користела електрична енергија. „И тогаш имаше отпор, но денес никој не се сомнева во придобивките,“ додаде таа.

Албанскиот премиер Еди Рама изјави дека со Диела јавните набавки ќе бидат „100 проценти без корупција“. Сепак, критичарите предупредуваат дека остануваат многу непознаници – меѓу кои и прашањето кој ќе сноси одговорност доколку дојде до грешка во алгоритмите или нивна манипулација.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.