Ким Џонг Ун: Приоритет е вештачката интелигенција
Лидерот на Северна Кореја, Ким Џонг Ун, го надгледуваше тестирањето на тактички дронови за напади, истакнувајќи ја потребата од унапредување на технологијата на вештачка интелигенција (AI) и зајакнување на оперативните способности на беспилотните летала, соопштија денес државните медиуми.
Ким вчера ги прегледа перформансите на дроновите, вклучувајќи тактички извидувачки дронови и мултифункционални беспилотни летала произведени од Институтот во рамки на Комплексот за технологија на беспилотна авијација.
Тестирањата потврдиле „извонредна ефикасност на тактичките јуришни дронови од серијата Кумсонг“ и нивната борбена применливост, со посебен акцент на воената вредност на овие дронови за надзор и стратегиско планирање, пренесе агенцијата Јонхап.
Ким истакна дека унапредувањето на вештачката интелигенција и оперативните способности на беспилотното оружје е главен приоритет во модернизацијата на севернокорејските вооружени сили.
Според неговите зборови, дроновите станале клучни средства во современото војување, а Северна Кореја планира понатамошен развој на овие технологии.
Медиумите истакнаа дека Северна Кореја неодамна извршила тестирања на „самоубиствени“ дронови опремени со технологии за вештачка интелигенција.
Според истражувачот Хонг Мин од Корејскиот институт за национално обединување, целта на Северна Кореја најверојатно е да покаже способност за извидување и напади на клучни воени цели, како што се радарски и противвоздушни бази, особено во контекст на актуелните воени вежби.
