Црна Хроника

Притвор за целата група фатена во акцијата за уништување на шумите

Постапувајќи по кривична пријава на МВР, Јавното обвинителство отвори истрага против 15 лица осомничени за тешки кривични дела поврзани со нелегална сеча на шуми во Малешевскиот регион. Осомничените се товарат за „Злосторничко здружување“ и „Пустошење на шуми“, а дел од нив и за „Злоупотреба на службена положба и овластување“, „Давање поткуп“ и „Примање поткуп“.

Истрагата опфаќа полициски службеници, вработени во државни институции и претпријатија, како и невработени лица, кои во текот на 2025 година формирале криминална група за противправна имотна корист. Според обвинителството, тие уништиле 6.000 хектари шума и нелегално исекле 1.500.000 метри кубни дрвна маса во вредност од над 6,4 милијарди денари.

Организаторите на групата ја продавале дрвната маса како легално исечена, со поддршка на полициски службеници кои им дојавувале информации за патроли и не преземале мерки. Директорот на ЈП Национални шуми – ПО Малешево и началникот на ОВР Делчево, според наводите, активно прикривале докази и овозможувале продолжување на криминалното дејствување.

Во август и септември 2025 година, првоосомничениот на директорот на ЈП Национални шуми му исплатил поткуп од 6.100 евра за да дозволи нелегална сеча, дури и пред официјалниот јавен повик за опожарена дрвна маса.

Дел од групата бил фатен на лице место во атарот на село Двориште, откако полицијата добила информации за нелегалната активност.

Обвинителството до Основниот кривичен суд Скопје поднесе предлог за определување притвор за сите 15 осомничени.

Црна Хроника

Казината на удар од Полицијата – Има приведени

Во доцните часови синоќа, МВР спроведе координирана акција во Скопје, при што беа извршени претреси на повеќе сомнителни локации. При акцијата биле запленети поголеми количини парични средства и опрема за коцкање, меѓу кои маси за покер, чипови и играчки карти.

Полициските тимови откриле и прашкаста и растителна материја, за која постои основано сомнение дека се работи за наркотична дрога.

Приведена е поголема група лица, а по целосно документирање на случајот, осомничените ќе бидат изведени пред надлежното јавно обвинителство.

Од Министерството за внатрешни работи најавуваат дека дополнителни информации ќе бидат објавени по завршување на истрагата.

Црна Хроника

Физички нападната девојка на работно место во Брвеница

На 11.12.2025 во 20:00 часот во СВР Тетово, В.И.(35) од Тетово пријави дека на работното место во угостителски објект на регионален пат Тетово-с.Брвеница, по претходна расправија, била физички нападната од друга вработена во објектот. Се преземаат мерки за расчистување на случајот.

Црна Хроника

Повреден пешак во сообраќајна несреќа во Скопје, возачот го напуштил местото на настанот

На 11.12.2025 година, околу 14:45 часот, во СВР Скопје е пријавена тешка сообраќајна несреќа на кружниот тек што ги поврзува улиците „Борис Сарафов“, „Лука Геров“, „Македонски војски“ и булеварот „Партизански Одреди“ во Скопје.

Непознат возач со патничко возило марка „мерцедес“ удрил во пешакот Х.М. (34). По несреќата, возачот не застанал да пружи помош, туку со возилото го напуштил местото на настанот.

Повредениот пешак се здобил со телесни повреди, кои биле констатирани во Градската општа болница „Св.Наум Охридски“.

Од страна на увидна екипа на СВР Скопје е извршен увид на местото на настанот и во моментов се преземаат сите неопходни мерки за целосно расчистување на случајот и откривање на сторителот.