Црна Хроника

Пукал со пиштол и удрил полицаец со автомобил – отвoрена истрага

Основното јавно обвинителство Струга поведе истрага против 34-годишен жител на Велешта за неовластено изработување, држење, посредување и тргување со оружје или експлозивни материи, предизвикување општа опасност и напад врз службено лице при вршење работи на безбедноста.

Според пријавата, на 16 септември осомничениот, при расправија со три лица од Дебар со кои имал претходно влошени односи, извадил пиштол и испукал неколку пати кон еден од оштетените, при што му нанел две лесни телесни повреди во долниот дел од нозете. Потоа влегол во возилото со намера да избега.

Тој не ја почитувал наредбата на полициски службеник да застане, а движејќи се наназад со автомобилот, го удрил полицаецот и му нанел телесна повреда. При увидот биле пронајдени нож и метална шипка, за кои се вршат дополнителни проверки за нивната улога во настанот.

Јавниот обвинител достави предлог за определување на мерка притвор за осомничениот.

Црна Хроника

Координирана полициска акција – откриен арсенал оружје, 12 уапсени во Скопје

Полицијата утрово спроведе голема координирана акција на повеќе локации во Скопје со цел спречување недозволена трговија со оружје и други криминални активности. Претреси биле извршени во Арачиново, Мојанце, Сингелиќ, Чаир, Брест, Љуботен, како и во Ченто и Инџиково.

Според првични неофицијални информации, пронајдени се три автоматски пушки, два пиштоли, значителна количина муниција од различни калибри, пет моторни возила и повеќе мобилни телефони кои се обезбедени за понатамошна истрага. Неофицијално, приведени се 12 лица.

Дел од акцијата била координирана и со Обвинителството за гонење организиран криминал и корупција. Оттаму потврдија дека под раководство на јавен обвинител се извршени претреси поради сомневање за кривични дела поврзани со оружје и дрога.

Полициските активности ќе продолжат и во текот на денот, а се очекува МВР да излезе со официјално соопштение со повеќе детали за утринската акција.

Црна Хроника

Тројца кумановци уапсени поради кражба на делови од автобус во Горно Којнаре

Тројца млади мажи од Куманово се лишени од слобода поради сомнение дека извршиле кражба на делови од автобус во селото Горно Којнаре. Според информациите од МВР, полициски службеници од СВР Куманово вчера (09.12.2025) околу 21:20 часот ги уапсиле А.Л. (31), М.Л. (26) и Д.З. (25).

Според првичните сознанија, тие на 12 октомври годинава со употреба на сила одзеле делови од автобус паркиран во кумановското село. По приведувањето, осомничените биле спроведени во полициска станица, каде во службен разговор го признале делото.

Од МВР информираат дека по целосно расчистување и документирање на случајот, против тројцата ќе бидат поднесени соодветни пријави.

Црна Хроника

Kривична пријава против поранешен министер за внатрешни – МВР со детали

На 09.12.2025 Одделот за сузбивање на организиран и сериозен криминал до ОЈО Скопје поднесе кривична пријава против О.С. (49) од Куманово, поради постоење на основано сомнение за сторено кривично дело „злоупотреба на службена положба и овластување“ по чл.353 ст.4 во врска со ст.1 од КЗ.

О.С. додека ја извршувал функцијата министер за внатрешни работи, односно во текот на 2021 година, искористувајќи ја својата службена положба и овластување овозможил на правен субјект- технички преглед во општина Сарај да се стекне со противправна имотна корист во износ од 5.565.927 денари.

О.С. делото го сторил на начин што во законски предвидениот рок не донел решение за одземање на овластување за технички преглед врз основа на предлог, доставен од надлежна организациска единица за граѓански работи. Истиот, иако знаел дека рокот за донесување решение за одземање на овластувањето е најдоцна до 15 дена од денот на доставување на предметот, не ја извршил својата службена должност согласно чл.65 ст.3 од Законот за возила и чл.5 од Правилникот за начинот и постапката за донесување и одземање на решението за овластување на правното лице за технички преглед на возила и за категории на возила за кои се издава овластување за технички преглед на возила.