Република

СКАНДАЛ: Осум години бил затворен реконструираниот базен во Пробиштип отворен неделава

Во Пробиштип неделава, градоначалникот Драган Анастасов – Ладич го претстави завршениот проект за реконструктуираниот затворен базен во ООУ „Никола Карев“ во Пробиштип. Сепак, долгогодишните најавувања и тајмингот на завршување пред избори отвори прашања низ општината и пошироко. Зошто еден веќе изграден базен во Пробиштип цели осум години стоеше заклучен? Зошто генерации деца пораснаа без можност за пливачки тренинзи, иако објектот беше таму?

Според достапни соопштенија и документи, базенот бил во функција и во 2017 година, кога таму се одржувала пливачка школа. Веднаш потоа објектот бил затворен со образложение за реконструкција, но цели години остана недостапен за учениците и младите од Пробиштип. Отворањето по толку долг период наметнува дилеми околу тоа колку навистина време било потребно за да се доврши зафатот и зошто во меѓувреме не беше одржуван.

Настанот беше проследен и со реакции дека проектот се претставува како сосема ново достигнување, иако неговата изградба и првична функционалност датираат од порано. Дополнителна тежина му дава фактот што отворањето доаѓа во период на интензивни подготовки за локалните избори во 2025 година, кога граѓаните ќе одлучуваат кому ќе му ја доверат довербата за водство на општината.

Отворањето на базенот, на крајот, носи повеќе прашања отколку одговори. Како се трошат јавните пари кога станува збор за вакви зафати? Дали навистина станува збор за долги административни процедури и технички реконструкции, или во позадина постои инает меѓу различни власти кои не сакаат да го признаат она што било направено претходно? И ако е така – дали токму тој пристап е причината што еднаш функционален базен цели осум години стоеше затворен?

Република

Повеќе делови од Тетово утре без електрична енергија

Повеќе делови од Тетово утре, 17 декември 2025 година, ќе останат без електрична енергија поради планирани прекини во дистрибутивната мрежа.

Според најавата, прекините ќе се одвиваат во периодот од 09:00 до 14:30 часот и ќе зафатат различни делови од градот. Без струја ќе бидат објекти на улицата „Борис Кидрич“, како и делови во кругот на поранешната печатница „Напредок“.

Дополнително, прекин е најавен и за делови од Тетово во населбите Два Бреста и Певчина, каде електричната енергија ќе биде исклучена во периодот од 09:20 до 13:00 часот.

Од надлежните служби информираат дека станува збор за планирани активности и апелираат до граѓаните навремено да ги прилагодат своите обврски.

Република

Лажни дојави на бомби: како се обезбедуваат училиштата во Македонија

Министерот за внатрешни работи, Панче Тошковски, потврди дека лажни дојави на бомби се забележани во повеќе градови и дека секогаш се постапува согласно антитерористички протоколи, без разлика дали дојавата е во училиште или на друго место со поголем број граѓани.

Министерката за образование и наука, Јаневска, истакна дека упатството за постапување по дојави на бомби е доработено и доставено до сите училишта, но МОН нема прецизна информација како се спроведува на терен. Таа посочи на несоодветна комуникација помеѓу врвните институции и локалните структури, додавајќи дека обврски имаат и градоначалниците и директорите на училиштата, особено во делот на евакуацијата и превозот на учениците.

„Сакам да ве уверам дека постапуваме согласно стандарди и протоколи како и останатите европски земји, делуваме превентивно и со целосна грижа за безбедноста на граѓаните, особено на децата“, изјави Тошковски. Тој додаде дека при појава на проблеми, тие се решаваат во најбрзо време и дека безбедноста на учениците останува прв приоритет.

Министерот потенцираше дека МВР сега многу поефикасно се справува со лажните дојави и дека максимално се преземаат сите дејствија во надлежност на министерството.

Република

Намалена видливост поради магла: внимателно на овие патишта

Поради појава на магла, видливоста во околината на Дебар е намалена до 50 метри, соопшти Автомото сојузот на Македонија (АМСМ).

Сообраќајот на државните патишта се одвива непречено, со претежно суви коловози, додека надвор од градските средини интензитетот на сообраќај е умерен. На граничните премини од македонска страна нема подолги задржувања за влез и излез од државата.

АМСМ препорачува возачите да се движат со прилагодена брзина, да ги почитуваат поставените сообраќајни знаци и внимателно да управуваат со возилата, особено на патиштата низ котлините, речните долини и клисурите каде постои ризик од одрони.

Посебна внимателност се советува на делниците: Катланово – Велес, Маврово – Дебар – Струга, Виница – Берово и Кочани – Делчево.