Со свечена церемонија во Битола започна 46. издание на Интернационалниот фестивал на филмска камера „Браќа Манаки“, посветен на уметноста на сликата и филмската камера.
Градоначалникот на Битола, Тони Коњановски, ја врачи наградата „Златна Камера 300“ за особен придонес во светската кинематографија на турскиот режисер Семи Капланоглу.
Во своето обраќање, Коњановски истакна дека фестивалот е повеќе од културен настан, нарекувајќи го „симбол на идентитетот на Битола и културен мост што ја поврзува локалната приказна со светот“.
„Како градоначалник, но пред сè како битолчанец, горд сум што Битола е домаќин на еден од најзначајните културни настани во регионот. Наша должност е да ја поддржуваме уметноста и да ја чуваме традицијата,“ нагласи тој.
На отворањето се обратија и директорот на фестивалот Димитрија Доксевски, претседателот на ДФРМ Игор Иванов – Изи, а претседателката Гордана Сиљановска-Давкова преку видео порака го прогласи фестивалот за отворен.
Филмот „Мајка“ на Теона Стругар Митевска, кој е дел од официјалната конкуренција за „Златна Камера 300“, го отвори овогодинешното фестивалско издание.
Во наредните седум дена, Битола ќе живее во знакот на филмот, со бројни проекции на светски признати остварувања прикажани на најпрестижните фестивали.
