Спорт

Македонскиот симбол од Мелбурн – Престон Лајонс на турнеја во Македонија, пријателски мечеви со Вардар и Пелистер

Најпознатиот македонски фудбалски клуб во Австралија, Престон Лајонс, кон крајот на септември ќе допатува во Македонија каде што ќе одигра две пријателски средби против домашните гиганти Вардар и Пелистер.

Првиот натпревар е закажан за 23 септември на стадионот „Петар Милошевски“ во Скопје, со почеток од 15:30 часот, против Вардар. Два дена подоцна, на 25 септември, Престон ќе се сретне со Пелистер во Битола, исто така во попладневен термин.

Екипата на Престон е составена главно од фудбалери со австралиски пасош, но во тимот настапува и поранешниот македонски младински репрезентативец Метју Божиновски. Клубот е силно поврзан со македонската дијаспора во Австралија, а со него е асоциран и легендарниот тренер Андон Дончески, кој со години работи во Мелбурн.

Престон Лајонс е формиран во 1947 година во северното предградие на Мелбурн и долги години беше познат под името Престон Македонија, претставувајќи симбол на македонската заедница таму. Во својата историја клубот има освоено титули во 1980, 1994, 2002 и 2007 година.

Во поновата ера, Престон бележи константен напредок – од НПЛ 3 Викторија во 2022 година, преку ВПЛ 1 во 2024, до враќањето во најсилната државна конкуренција, НПЛ Викторија, во 2025 година. Дополнително, клубот оваа година доби потврда дека ќе биде дел од новоформираното натпреварување Australian Championship, кое стартува во октомври, со амбиција во блиска иднина да игра и во втората австралиска лига, а подоцна и во елитната А-лига.

Спорт

Македонија, доколку се пласира на СП, ќе игра со Мексико, Јужна Африка и Јужна Кореја

Доколку Македонија обезбеди пласман на Светското првенство 2026 година, нашата репрезентација ќе биде дел од групата А, заедно со селекциите на Мексико, Јужна Африка и Јужна Кореја.

Пред тоа, националниот тим се соочува со тежок предизвик – полуфинале од баражот против Данска. Во случај на победа, нашата репрезентација ќе игра со победникот од дуелот Република Ирска – Чешка во финалето на плеј-офот.

Спорт

Меси размислува за пауза од Светското првенство 2026

Аргентинската фудбалска легенда Лионел Меси најави дека постои можност да го пропушти Светското првенство кое ќе се одржи следното лето, нагласувајќи дека можеби ќе го следи турнирот од трибините, наместо да настапува на теренот.

„Се надевам дека ќе можам да бидам таму. Веќе реков дека би сакал да учествувам. Но, во најлош случај, ќе бидам присутен и ќе го гледам во живо, што сепак ќе биде посебно“, изјави Меси, цитиран од ESPN.

Осумкратниот добитник на „Златната топка“ ќе наполни 39 години во јуни и додава дека сѐ уште има желба за натпреварување, но возраста и физичката подготвеност можат да влијаат на неговото учество на престојниот турнир.

Спорт

МАКЕДОНИЈА СЛАВИ ПРОТИВ ТУРЦИЈА НА ОТВОРАЊЕТО НА ТУРНИРОТ ВО АНКАРА

Женската ракометна репрезентација на Македонија стартуваше успешно на турнирот во Анкара, совладувајќи ја домашната селекција на Турција со 29:26. Натпреварот беше израмнет најголемиот дел од времето, со 12:12 на полувреме, но избраничките на селекторот Кристијан Грчевски го презедоа контролата во финишот и стигнаа до важен триумф.

Емилијана Ризоска блескаше со 11 постигнати гола, додека голманката Драгана Петковска се истакна со 10 интервенции, меѓу кои и одбрана на седмерец, што значително го насочи натпреварот во корист на Македонија.

Нашите ракометарки утре од 12 часот ќе играат против Словенија, а турнирот ќе го затворат в недела со дуел против Словачка, кој започнува во 10 часот.