Авионот, кој првично не можел да се идентификува, летал во меѓународен воздушен простор без план за лет или радио контакт. Според ДПА, рускиот воен авион личел на извидувачкиот Ил-20М.
Германските ловци полетале од воениот аеродром Росток-Лаге за да го пресретнат. Германските вооружени сили чуваат дополнителни авиони во готовност за заштита на воздушниот простор на источното крило на НАТО по серијата нарушувања од Русија.
На барање на Естонија, утре ќе се одржи вонреден состанок на Советот за безбедност на ОН поради зачестените упади на руски авиони во воздушниот простор на сојузниците.
Германскиот пратеник Јирген Харт, портпарол за надворешна политика на конзервативниот блок на канцеларот Фридрих Мерц, повика на соборување на секој руски авион што ќе го наруши воздушниот простор на НАТО. „На Кремљ му е потребен јасен знак стоп“, изјави Харт, предупредувајќи дека инаку Русија може да продолжи со ескалација.
Сојузниците на НАТО ќе се состанат следната недела, откако Естонија соопшти дека три руски борбени авиони нелегално влегле во нејзиниот воздушен простор. Пред тоа, полските и сојузничките сили првпат соборија руски беспилотни летала над територијата на НАТО, а потоа уште 19 беспилотни летала влегоа во Полска, кои беа соборени со поддршка на воени авиони од други членки на Алијансата.
