Во време на зголемен метеж на автопатите, возачите кои користат М-ТАГ уреди за електронска наплата на патарина сè почесто се соочуваат со доцнење наместо со привилегија. Причината е што на истите ленти, означени како „брзи“ за М-ТАГ, се врши и наплата со картички, што доведува до чекање и застој.
Од Јавното претпријатие за државни патишта (ЈПДП) за „Факултети.мк“ велат дека лентите со ознака М-ТАГ на пристапниот семафор се предвидени исклучиво за електронска наплата. Кога возачи со М-Кард или платежни картички се вклучуваат во тие ленти, настанува непотребно задржување.
– На сите електронски ленти има поставено читачи и за М-ТАГ уреди и за смарт-картички М-Кард, како и за платежни картички. Апелираме граѓаните да ги почитуваат ознаките. Во тек е пронаоѓање трајно решение за оваа проблематика – порачаа од ЈПДП.
Во моментов, наплатните станици во Тетово и Гостивар сè уште немаат електронска наплата, но според ЈПДП, тие наскоро ќе бидат модернизирани. Како дел од проектот за Коридорот 8, планирана е и реконструкција на патарината во Миладиновци со воведување електронски систем.
Од претпријатието информираат дека во тек е воспоставување малопродажна мрежа за надополнување на М-Кард и М-ТАГ уредите преку два избрани оператори, со што ќе се олесни користењето на електронската наплата.
Во првата половина од годинава од патарини се инкасирани 30,89 милиони евра, што е за 1,26 милиони евра повеќе од истиот период лани. ЈПДП бележи и сериозен раст на користењето на електронската наплата, а во рамките на иницијативата „Отворен Балкан“ досега се регистрирани над 5.000 македонски и 8.500 српски тагови.
Електронската наплата на патарина во Македонија е воведена во јули 2019 година, а на Коридорот 8 последни целосно дигитализирани станици се Глумово и Желино.
