Драч – На Форумот на „зелени“ градоначалници во Драч, 19 општини од Западен Балкан потпишаа заедничка декларација за основање на Алијансата „Green Mayors“, регионална платформа за забрзување на зелената транзиција преку општинско лидерство и прекугранична соработка.
Настанот беше организиран од Фондацијата Отворено Општество – Западен Балкан (OSF–WB) и на него учествуваа повеќе од 100 општински лидери, претставници на училишта, организации на граѓанското општество и експерти за енергетика.
Градоначалникот на општина Битола, Тони Коњановски, на панел дискусијата истакна дека проектот „Сончеви училишта“ и сличните иницијативи покажуваат како промените можат да се случат на ниво на заедницата. Тој додаде дека општината истражува неколку зелени решенија, вклучувајќи електричен јавен превоз и изолација на стари згради, со цел граѓаните да се подготват за иднината на праведен и одржлив начин.
На конференцијата беше нагласено дека Општина Битола е високо позиционирана меѓу градовите на Западен Балкан според реализираните проекти и иницијативи за енергетска ефикасност и зелени решенија.
