Мицкоски: Растот на економијата и стабилната бизнис клима ја отвораат вратата за странски инвестиции
Премиерот Христијан Мицкоски истакна дека растот од над 3% на БДП во изминатите четири квартали, забрзаното градежништво, како и растот во туризмот и земјоделството, претставуваат добра препорака за странските директни инвестиции. Тој нагласи дека владата се стреми кон економска стабилизација и создавање бизнис клима без политички притисоци врз компаниите.
– Имаме номинален раст на БДП од 7,8% и очекуваме до третиот квартал да достигнеме раст од околу 4%. Приоритет ни е поддршка на домашните и странските инвестиции, како и забрзување на градежништвото, туризмот и земјоделството – изјави Мицкоски.
Тој посочи дека туризмот бележи раст од 15% во бројот на посетители и 10% во преноќувањата, а очекува до крајот на годината бројот на туристи да достигне 1,5 милиони. Градежната индустрија, пак, е поврзана со капитални инвестиции како автопати, брзи патишта и училишта, што го забрзува економскиот раст.
Стапката на инфлација во јуни изнесувала околу 4%, со месечен просек од 0,2%, а владиниот приоритет е консолидирање на инфлацијата на околу 3%.
Главниот извршен директор на Стопанската комора на Дубаи, Мохамед Али Рашед Лута, изрази очекување дека билатералното партнерство со Македонија има голем потенцијал за раст, особено во трговијата, одржливоста и дигиталната економија, со можност за зголемување на трговијата и до 20% до 2030 година.
Рашед Лута потенцираше дека Дубаи нуди поволна бизнис средина со светска инфраструктура и глобална поврзаност, каде македонските компании можат да го зголемат својот раст на меѓународните пазари, вклучително и на африканските. Стопанската комора на Дубаи останува посветена на поддршка на заедничката соработка и поврзување на бизнис заедниците од двете земји.
