Основното јавно обвинителство Битола покрена постапка против четири лица за кривично дело – предизвикување општа опасност, по член 288 став 1 од Кривичниот законик. Осомничените се сомничат дека заеднички, со директно учество или друг особен придонес, подметнале експлозивна направа пред куќа во Битола.
Според Јавното обвинителство, на 12 јули годинава, бомбата М-75 била фрлена кон куќа на улицата „Охридска“, при што биле оштетени седум паркирани возила, а животот на граѓаните бил изложен на сериозна опасност. Двајца осомничени учествувале директно со моторцикл во подметнувањето на експлозивот, додека другите двајца овозможиле и придонеле кон извршувањето на делото.
Јавниот обвинител предложи судот да им определи мерка притвор на четворицата, од кои еден во моментов е недостапен на органите на прогонот.
