САД се во тага и шок по убиството на конзервативниот активист Чарли Кирк, изјави американскиот претседател Доналд Трамп на комеморацијата во спортската арена „Стејт Фарм“ во Аризона. „Кирк беше убиен затоа што ја зборуваше вистината“, рече Трамп, додавајќи дека тој бил симбол на борбата против радикалната левица.
Претседателот најави дека Министерството за правда ќе ги открие „злите луѓе“ кои, според него, плаќаат политички поттикнувачи за напади врз конзервативни активисти. Тој истакна дека Кирк бил маченик за американската слобода и потсети дека одиграл клучна улога во неговата претседателска победа преку мобилизација на младите гласачи.
„Никој никогаш нема да го заборави Чарли Кирк – ниту ние, ниту историјата“, нагласи Трамп и најави дека наскоро ќе му биде доделен Медалот на честа посмртно. Тој додаде дека, за разлика од Кирк кој не ги мразел своите противници, самиот има поинаков став: „Јас ги мразам моите противници и не им посакувам добро. Можеби неговата сопруга Ерика ќе успее да ме убеди дека грешам“.
Пред претседателот, со обраќање се јави и вдовицата на Кирк, Ерика, која доби долг аплауз од присутните. Американскиот државен секретар Марко Рубио претходно истакна дека Кирк бил познат по тоа што не се дистанцирал од луѓе со кои имал различни ставови.
Белата куќа претходно објави фотографија од Трамп на комеморацијата со натпис: „Ова е пресвртница“.
