На вчерашното Генерално собрание на Обединетите нации, премиерите на Луксембург, Малта и Монако официјално ја признаа државата Палестина.
„Ова е почеток на обновена посветеност на надежта, дипломатијата, дијалогот, коегзистенцијата и решението за две држави. На идејата, кревка, но сепак можна, дека мирот може да преовлада“, изјави премиерот на Луксембург, Лук Фриден. Тој нагласи дека оваа одлука „не е насочена против Израел или неговиот народ“.
Во исто време, Андора и Белгија најавија дека ќе го следат истиот чекор откако ќе бидат ослободени сите заложници и Хамас повеќе нема да има контрола во Газа. Белгискиот премиер Барт де Вевер истакна дека отворањето амбасада и склучувањето договори со Палестина ќе се реализираат по исполнување на условите од Њујоршката декларација.
Најголемо внимание привлече одлуката на Франција – претседателот Емануел Макрон свечено објави дека земјата ја признава Палестина „за мир меѓу израелскиот и палестинскиот народ“. „Дојде време“, рече Макрон, нагласувајќи дека Франција останува доследна на својата историска посветеност кон Блискиот Исток.
Претходно, Велика Британија, Канада, Австралија и Португалија веќе ја признаа Палестина.
