Апелациониот суд во Гостивар ја потврди пресудата на Основниот суд во Тетово со која Менсур Пајазити од Голема Речица е осуден на две години затвор за сообраќајната несреќа во која во август 2022 година загина 22-годишната Теодора Ристовска.

Семејството на Теодора реагира со отворено писмо до јавноста, нарекувајќи ја одлуката „срам за правдата“ и „подбив со жртвата и нивната болка“.

„Животот на Теодора згасна, а казната изгледа како подбив. Наместо вистинска правда, добивме минимализирање на трагедијата која нè скрши. Наместо мир, добивме уште поголема недоверба и омраза“, се наведува во писмото.

Според нив, аргументот на обвинетиот дека казната е „превисока“ поради јавниот интерес е апсурден, бидејќи „сосема природно е секој да биде потресен кога млад живот ќе згасне“.

Семејството додава дека, иако натамошниот правен пат до Врховниот суд зависи од Јавното обвинителство, тие нема да замолчат:
„Не бараме привилегии, бараме човечност и фер однос. Кога казната е непропорционална со загубата, виновен станува не само сторителот, туку и самиот систем.“

Во пресудата од април годинава, Пајазити беше прогласен за виновен затоа што управувал автомобил „БМВ“ со брзина од 59 километри на час, која не била прилагодена на условите на патот, и не му отстапил првенство на пешакот – тогаш 22-годишната Теодора – која поминувала на обележан премин.

Првично, во ноември 2023 година тој доби казна од три и пол години затвор по признавање на вина. Апелација ја намали казната на две години, по што Врховниот суд ги укина двете пресуди и предметот го врати на повторно судење. На повтореното рочиште во април 2025 година, обвинетиот повторно ја призна вината и доби идентична казна – две години затвор.

Семејството на Теодора заклучува дека ќе продолжи да бара одговорност:
„Кога убиецот шета слободен, целата нација е жртва. Животот на Теодора не е бројка во досие – тоа е наша вечна рана. Нема да престанеме да бараме вистинска правда.“