Една од поубавите природни глетки што треба да го краси Гостивар – реката Вардар, деновиве е речиси целосно пресушена. Наместо силен тек, остана суво корито полно со камења, а вода има само во неколку помали бари, што ја претвора реката во тажен потсетник за итни интервенции.
Состојбата не е последица само на летните горештини, туку и на долгогодишната негрижа. Коритото е преполно со ѓубре, а бреговите обраснати со запуштена вегетација, што ја нагласува потребата од сериозно одржување и заштита.
Граѓаните очекуваат институциите да преземат конкретни мерки за чистење и зачувување на речното корито, како и вложување во проекти за заштита на животната средина. Во спротивно, Вардар ќе остане само тажна слика на запуштеност, а Гостивар ќе го изгуби едно од своите највредни природни богатства.
