Македонија

ВЛЕН: „Селотејп коалицијата“ Ахмети – Таравари – Села ќе доживее пораз на 19 октомври

Коалицијата Таравари – Села – Ахмети, која ВЛЕН ја нарекува „селотејп коалиција“, е целосно обземена од стравот од поразот кој, според нив, ќе им се случи на 19 октомври. Од ВЛЕН нагласуваат дека најновото политичко сојузништво на ДУИ со анти-ЕУ и анти-НАТО партијата Левица претставува најголемо разобличување на нивната вистинска политика по 20 години ветувања за интеграција.

„Денес, Ахмети и неговите луѓе станаа партнери со Левица само за парче власт. Ова е најголемото предавство на европската и евроатлантската ориентација на Албанците,“ стои во соопштението на ВЛЕН.

Од таму потсетуваат дека лидерот на ДУИ, Али Ахмети, сè уште должи одговори на неколку клучни прашања што ја засегаат јавноста:

Зошто беше толериран градоначалникот на Липково кој, според обвинувањата, ги труел жителите со арсеник?

Зошто и понатаму се брани кадар кој од САД е прогласен за лице вмешано во корупција?

Кога последен пат Ахмети остварил средба со меѓународен релевантен фактор?

„Светот веќе знае која е ДУИ, но тие и понатаму мислат дека со методите на оние кои бегаа од правдата за корупција ќе можат да ги излажат Албанците,“ додаваат од ВЛЕН.

Движењето порачува дека на 19 октомври граѓаните ќе дадат јасен и заслужен одговор на оваа политика, избирајќи промена и европска иднина наместо, како што велат, „заглавеноста во криминал и корупција“.

Македонија

Божиновска присуствуваше на шведската прослава на светлината

Вечерва Сања Божиновска присуствуваше на традиционалниот концерт во чест на Санта Луција, кој го организираше Шведската амбасада. Празникот е симбол на светлина, топлина и надеж во најтемните нордиски ноќи.

„Секогаш е убаво кога една традиција носи порака која допира подалеку од границите – дека светлината ја создаваме самите, и дека најмногу ни е потребна токму во студените, тивки моменти од годината“, изјави Божиновска.

Таа изрази благодарност до амбасадата за прекрасната атмосфера и можноста да ја почувствува оваа уникатна шведска традиција, која најавува доаѓањето на Божиќ со радост, музика и светлина.

Македонија

Сообраќајот на Евзони повторно во прекин од 17 часот

АМСМ информира дека од 17 часот повторно е блокиран сообраќајот на Граничниот премин Евзони (ГП Богородица).

Според последните информации, сообраќајот на државните патишта се одвива непречено, по суви коловози и со умерен интензитет надвор од градските средини. На македонските гранични премини нема подолги задржувања за влез или излез од државата.

АМСМ апелира до возачите да возат со прилагодена брзина, да ја почитуваат поставената сигнализација и да бидат особено внимателни на патиштата низ котлинските и клисурните делови, каде што постои ризик од одрони. Најкритични се делниците Катланово – Велес, Маврово – Дебар – Струга, Виница – Берово и Кочани – Делчево.

Македонија

Студентите имаат уште десет дена за апликација за ваучери

Министерството за дигитална трансформација потсетува дека студентите имаат рок до 20 декември 2025 година да аплицираат за ваучери за електронски уреди.

Досега се доделени 42.606 ваучери, од кои 27.426 веќе се искористени. Во рамките на владината програма, предвидени се вкупно 55.000 ваучери за студенти на додипломски студии запишани во учебната 2025/26 година.

Ваучерите можат да се искористат најдоцна до 31 декември 2025 година.