Градоначалникот на општина Кисела Вода и кандидат за градоначалник на Скопје, Орце Ѓорѓиевски, денеска оствари средба со дел од скопските угостители, на која, како што соопшти, се разговарало за предизвиците и можностите за развој на угостителскиот сектор и оживување на ноќниот живот во главниот град.
„Угостителите се моторот на градската економија, дел од пулсот на Скопје, од неговата динамика и енергија. Се согласивме дека ноќниот живот мора повторно да заживее“, истакна Ѓорѓиевски.
Од средбата произлегол и предлог во неговиот иден кабинет да има посебен советник за угостителите, кој ќе биде избран од нив и ќе биде мост меѓу секторот и градските власти.
„Нашиот град заслужува да биде полн со енергија, младост и креативност, а тоа е возможно само со силна поддршка и партнерство со угостителите. Заедно ќе го направиме Скопје град на култура и силна економија“, додаде Ѓорѓиевски.
