Во Битола се одржа средба меѓу претставници на Регионалната стопанска комора, Комората на занаетчии, градоначалникот Тони Коњановски, секретарот на општината Борче Димитровски, заменик-министерот за економија и труд Маријан Ристески и пратениците Пеце Милевски и Силвана Ангелевска.
Заменик-министерот Ристески посочи дека компаниите во битолскиот регион активно ги користат мерките од оперативниот план за 2025 година, како и програмите на Министерството за економија и труд. Тој нагласи дека потребите на локалното стопанство ќе бидат основа за подобрување на мерките, а посебно значење ќе има развојот на инфраструктурата и железничкото поврзување.
Градоначалникот Коњановски истакна дека битолскиот регион има сериозен потенцијал за инвеститори, со особено интересирање за Индустриската зона „Жабени“. „Вратата за стопанствениците кај нас е секогаш отворена, а проблемите кои ги имале се решени или се во процес на решавање. Придобивките од Унгарскиот кредит ќе донесат бенефит не само за локалната самоуправа, туку и за бизнис секторот, особено во делот на инфраструктурата“, рече тој.
Претседателот на Регионалната стопанска комора, Мирко Велковски, посочи дека бизнис заедницата во Пелагонискиот регион бележи раст од околу 5% годинава, а над 60 компании користат средства од Унгарскиот кредит, дел од нив насочени кон зелена енергија. Според него, очекувањата се дека искористувањето на кредитните линии и грантовите ќе донесе значителни бенефити за целиот регион.
