Скопје

Ѓорѓиевски: Кисела Вода добива свој прв плоштад во Расадник

Кисела Вода за првпат ќе добие јавен плоштад, кој се гради во срцето на населбата Расадник, соопшти градоначалникот Орце Ѓорѓиевски. Според него, плоштадот ќе внесе свежа енергија во секојдневието на жителите и ќе го подобри урбаниот изглед на општината.

„Денеска направив увид на терен и со големо задоволство можам да кажам дека веќе се обликува место на кое сите ќе уживаме“, изјави Ѓорѓиевски.

Новата површина од 4.000 м² ќе вклучува парковско зеленило, современо детско игралиште, фонтанa, урбана опрема и современо осветлување. Средствата за овој проект се обезбедени преку повикот за капитални инвестиции од Владата.

Плоштадот ќе се наоѓа во непосредна близина на спортската сала „Расадник“, која исто така се реновира од темел, додава градоначалникот. Со новиот плоштад, жителите на Расадник и пошироката околина добиваат место за рекреација, дружење и одмор.

„Ова е уште еден чекор кон поквалитетно секојдневие, повеќе простор за семејни активности и подобрен урбан изглед на нашата населба“, нагласи Ѓорѓиевски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.

Република

Системот „Безбеден град“ ќе санкционира само сериозни прекршоци, најавува Тошковски

Министерот за внатрешни работи Панче Тошковски истакна дека системот „Безбеден град“ ќе се спроведува со прецизно дефиниран праг на толеранција, со цел зголемување на безбедноста во сообраќајот и јавниот простор, а не казнување по секоја цена.

Тошковски нагласи дека системот ќе биде насочен кон препознавање и санкционирање на сериозни и опасни прекршоци, особено оние кои директно го загрозуваат животот и безбедноста на граѓаните. Според него, целта е да се воспостави ред и превенција, а не репресија без разум.

„Ќе има јасни правила, транспарентност и точно утврдени критериуми. Граѓаните ќе знаат што се санкционира и зошто. Системот нема да биде лов на прекршители, туку алатка за заштита на човечки животи“, потенцираше министерот.

Проектот „Безбеден град“ предвидува користење на современи технолошки решенија, камери и софтвер за следење на сообраќајот, со што ќе се подобри контролата и ќе се намали бројот на сообраќајни несреќи.

Министерството најави дека имплементацијата ќе оди фазно, со претходна информираност на јавноста и соодветен период за прилагодување, со цел граѓаните навремено да се запознаат со новиот систем и неговото функционирање