Во рамките на 46. Интернационален фестивал на филмска камера „Браќа Манаки“ во Битола, вечерва беше доделена највисоката награда – „Златна камера 300“ за животно дело.
Лауреат е светски познатиот кинематографер Дариус Конџи, автор на култни визуелни остварувања како „Седум“ со Бред Пит и Морган Фримен, „Полноќ во Париз“, „Седум години на Тибет“ и „Евита“.
Наградата на Конџи му ја врачи министерот за култура Зоран Љутков, а во церемонијата што се одржа во пријатната атмосфера на Пионерскиот дом присуствуваше и градоначалникот на Битола, Тони Коњановски, кој му врачи специјална плакета со македонски орнамент.
Конџи, кој е роден во Иран и израснат во Париз, уште од рана возраст ја негува љубовта кон киното и театарот, оставајќи зад себе богата филмографија со визуелни ремек-дела кои го одбележаа светското филмско творештво.
