Првиот вицепремиер и министер за животна средина и просторно планирање, Изет Меџити, оствари средба со жителите на Серава, каде што разговараше за тековните и идните проекти кои директно го менуваат квалитетот на животот на граѓаните во оваа населба и во целиот Чаир.
На средбата Меџити истакна дека локалните власти веќе работат на комплетна реконструкција на уличната инфраструктура, модернизација на водоводниот систем, уредување на плоштадите и јавните простори, поставување на ново и современо осветлување, како и создавање нови паркинг-места. Дополнително, тој најави значајни инвестиции во училиштата и детските градинки, нагласувајќи дека развојот на Чаир започнува со грижа за децата и семејствата.
„Чаир ден по ден доживува видлива трансформација. Нашата визија е јасна – да изградиме урбана средина што ќе обезбеди подобар, побезбеден и подостоинствен живот за секоја фамилија“, порача Меџити.
Според него, проектите што се реализираат се темелат на посветеност и визија, а конечната цел е Чаир да се доближи до стандардите на современите европски градови.
