Балкан

Вучиќ: „Америка воведува санкции за Нафтната индустрија на Србија – не очекува тешка зима“

Претседателот на Србија, Александар Вучиќ, потврди во Њујорк дека американските санкции за Нафтната индустрија на Србија (НИС) ќе стапат на сила на 1 октомври. Тој истакна дека нафта нема да недостасува во наредниот период, но компанијата ќе се соочи со сериозни проблеми при исплата на плати и во деловните трансакции, бидејќи, како што посочи, „ниедна банка нема да сака да соработува со компанија под американски санкции“.

Вучиќ оцени дека Србија во овој случај е „колатерална штета на односите меѓу Америка, Западот и Русија“. Тој нагласи дека државата, и покрај коректниот однос и со Москва и со Вашингтон, плаќа висока цена поради рускиот сопственички удел во НИС. „Ќе се обидеме граѓаните да имаат топла зима и да не се грижат за горивото, но сè останато ќе биде многу потешко“, порача српскиот претседател.

Тој додаде дека владата се обидува да најде решенија, но во овој момент „не гледа излез“. Американската страна инсистира на санкции и покрај предлозите за одложување, додека руската страна ги одбива понудените решенија. „Што да правам, да им заканувам на Русите или на Американците? Ние сме мали, нема смисла, а морам на народот да му обезбедам нафта“, рече Вучиќ, предупредувајќи на „тешко време и тешка зима“.

Можното воведување санкции за НИС има директно влијание и врз Хрватска, бидејќи би се прекинала испораката преку Јадранскиот нафтопровод (ЈАНАФ), што би значело загуба на значителен дел од приходите за таа хрватска компанија. Од ЈАНАФ соопштија дека компанијата обезбедила лиценца за продолжување на договорот за транспорт на сурова нафта со НИС до 1 октомври 2025 година и дека ќе се обратат до американскиот Уред за контрола на странска имот (OFAC) за продолжување на лиценцата и по тој датум.

Хрватскиот министер за економија, Анте Шушњар, предупреди дека губењето на соработката со НИС би значело значителни финансиски последици за ЈАНАФ и зголемени трошоци за складирање нафта која не би можела да се транспортира.

Балкан

Косово доби моќно оружје

Косово го примило германскиот противтенковски систем „Панцерфауст 3“ како дел од билатералната безбедносна соработка, објавија косовските медиуми. Испораката има за цел зајакнување на одбранбените капацитети на Косовските безбедносни сили (КБС) и нивна постепена модернизација во согласност со стандардите на евроатлантските партнери.

Косовските власти потенцираат дека системот ќе се користи исклучиво за одбранбени цели и професионална обука. „Панцерфауст 3“ е еден од најнапредните противтенковски системи што ги користат неколку европски армии. Договорот со Германија се оценува како дополнителен доказ за поддршката на Берлин за стабилноста и безбедноста во регионот.

Балкан

Тирана во хаос: Протестите пред Владата ескалираа со молотови коктели и судири

Тензична и насилна ноќ ја одбележа Тирана, откако масовниот протест на обединетата албанска опозиција пред владината зграда ескалираше во отворени судири со полицијата. Демонстрациите, најавени како притисок за смена на власта, прераснаа во хаос со фрлање молотови коктели, пиротехника и оштетување на државен имот.

За време на говорите на опозициските лидери, дел од демонстрантите започнаа да фрлаат запаливи направи кон Владата, по што избувна оган и мораше да интервенира противпожарно возило. Толпата се обиде да го пробие полицискиот кордон, при што беше откорнат дел од заштитната метална ограда. Во инцидентите, според официјални информации, повреден е еден полициски службеник.

Лидерот на Демократската партија, Сали Бериша, од говорницата упати остри пораки кон премиерот Еди Рама, обвинувајќи го за корупција и криминал. Тој порача дека опозицијата ќе го „собори режимот“ и најави, како што рече, „политички погреб“ за актуелната власт, споредувајќи ја состојбата во Албанија со масовните бунтови во други земји.

Бериша истакна дека протестите се „историска и животна шанса“ за спас на државата, повторувајќи ги клучните барања на опозицијата – формирање техничка влада и одржување слободни и фер избори.

Владините институции, очигледно, очекувале ескалација. Околу 1.500 полициски службеници беа распоредени околу објектот, поставени беа дополнителни метални заштитни конструкции, а превентивно беа отстранети новогодишната елка и украсите од просторот пред Владата, која целосно беше претворена во силно обезбедена зона.

Балкан

ВИДЕО: Тепачка во турскиот парламент поради Ататурк

Синоќа во Турското Големо национално собрание дојде до сериозен инцидент кога расправата за државниот буџет прерасна во физичка пресметка меѓу пратеници од власта и опозицијата. Наместо аргументи и амандмани, салата накратко се претвори во сцена на туркање и размена на удари, откако беа изнесени спротивставени ставови за улогата и наследството на Мустафа Кемал Ататурк.

Вербалните провокации брзо ескалираа, по што неколкумина пратеници влегоа во директен судир. Тепачката траеше околу десет минути, а обезбедувањето и дел од пратениците се обидуваа да ги раздвојат инволвираните и да воспостават ред во салата.

И покрај хаосот, работата на парламентот продолжи. Откако тензиите се смирија, пратениците се вратија на своите места и пристапија кон гласање. Нацрт-законот за буџетот за 2026 година беше усвоен со 320 гласа „за“ и 249 „против“, а паралелно беше изгласан и финансискиот извештај за 2024 година.

Турскиот претседател Реџеп Таип Ердоган во својата јавна реакција воопшто не го спомена инцидентот. Тој се фокусираше исклучиво на усвојувањето на буџетот, оценувајќи дека тој ќе биде од корист за државата, граѓаните и економијата.

Причината за судирот, како што наведуваат турските медиуми, биле спротивставените толкувања и политички ставови околу значењето на ликот и делото на Мустафа Кемал Ататурк, тема која и понатаму предизвикува длабоки поделби на турската политичка сцена.

Видеото може да го погледнете тука