Министерката за енергетика, рударство и минерални суровини Сања Божиновска оствари работна средба со Гавин Ферар, извршен директор на Central Asia Metals (CAML), и Џејмс Караматич, новиот генерален директор на рудникот „САСА“.
На средбата главниот акцент беше ставен на условите за работа и безбедноста на вработените, јакнењето на транспарентноста, поголемата грижа за животната средина и усогласувањето на развојните планови на компанијата со националната стратегија за одржливо рударство.
„Нашата цел е јасни правила на игра за компаниите и највисоко ниво на заштита на граѓаните и природата. Рударството мора да се развива на одговорен и одржлив начин – со економски раст, сигурност за работниците и почит кон локалната заедница“, истакна Божиновска.
Таа додаде дека ваквиот вид на дијалог е гаранција за партнерство меѓу институциите и стопанството, во интерес на граѓаните и на долгорочниот развој на рударскиот сектор.
