Рускиот министер за надворешни работи, Сергеј Лавров, од говорницата на Генералното собрание на Обединетите нации предупреди дека Москва ќе одговори „одлучно“ на секоја агресија врз нејзината територија.
Лавров изрази сериозна загриженост поради, како што рече, „опасните изјави“ на одредени политичари од земјите членки на НАТО и ЕУ, кои во последните недели зборуваат дека Третата светска војна е „реално можно сценарио“.
„Русија е обвинувана дека подготвува напад врз НАТО и Европската унија. Претседателот Путин веќе повеќепати ги разобличи тие провокации. Оние што шират вакви пораки ја поткопуваат секоја можност за постигнување праведна рамнотежа на интереси меѓу земјите во меѓународната заедница“, рече Лавров.
Напнатоста дополнително расте на источниот фронт на Алијансата, откако Естонија ја обвини Москва дека испратила три воени авиони во нејзиниот воздушен простор, а НАТО соопшти дека во полскиот воздушен простор биле соборени руски дронови.
Американскиот претседател Доналд Трамп неодамна порача дека поддржува обарaње на руските воени авиони кои ќе го нарушат воздушниот простор на Алијансата, оценувајќи ја руската армија како „тигар од хартија“.
Од Советот за безбедност на ОН, Вашингтон повтори дека ќе го брани „секоја педа од територијата на НАТО“.
На маргините на заседањето во Њујорк, Лавров имаше и средба со американскиот државен секретар Марко Рубио.
