Свет

Поранешен сојузник на Путин: Санкциите не го вознемируваат — единствено воена сила може да го запре

Михаил Ходорковски, некогашен руски олигарх и политички затвореник, во анализа за Politico предупредува дека економските санкции сами по себе не го задржуваат агресивното однесување на Кремљ. „Одуземање чаша виски пијанец нема да го отрезни“, пишува тој, посочувајќи дека санкциите не меѓутоа не создаваат вистинска способност за одвраќање без паралелни инвестиции во одбранбени сили и спремност за нивна употреба.

Ходорковски тврди дека конфликтот во Украина е стратешка и идеолошка битка против идејата за просперитетни демократии во соседството, а не обична економска борба за ресурси. По таа причина, енергетските мерки — намалување увоз, ограничување цени и секундарни санкции — даваат ограничен ефект, особено оти Западот и натаму плаќа милијарди за руски гас и нафта.

Според него, иако санкциите можат да нанесат финансиска штета, тие не ги нарушуваат основите на руската способност да води војна. На пример, при цена на нафтата од 70 долари за барел, Русија добива околу 60 милијарди долари приходи, од кои приближно 40% се користат за финансирање на војни активности. Постоечките санкции ја намалиле таа сума, но дури и губитоците од 30–40 милијарди долари, па и дополнителни 10–15 милијарди преку секундарни мерки, според Ходорковски, не се доволни за да принудат Москва на промена на курсот.

Тој укажува и на практични пречки: отстранувањето милиони барели руска нафта од глобалниот пазар без предизвикување шок на цените е технички и политички тешко изводливо, а Русија лесно наоѓа алтернативни пазари кои на конфликтот гледаат оддалечено.

Како единствена трајна опција за запирање на руската агресија, Ходорковски ја наведува масивната и долготрајна воена надградба на НАТО. Без јасна и спремна воено-стратегиска способност, вели тој, европските лидери ризикуваат да ја препуштат стратегиската иницијатива на САД и да охрабрат Кина и други актери.

Бившиот олигарх предупредува дека неодамнешните инциденти со руски дронови кои влегле во воздушниот простор на Полска и Романија ја покажуваат екзистенцијалната закана пред која стои Европа и дека таквата закана бара „бескомпромисен одговор“.

Ходорковски заклучува дека санкциите се чекор во вистинската насока, но само „гребат по површината“ на потребната одлучност. Дека без значајно и трајно воено зајакнување на западните сојузи нема причина да се очекува дека Кремљ ќе биде принуден на повлекување или преговори.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.