НАТО ја засилува присутноста во Балтичкото Море поради упади на дронови во Данска
НАТО вечерва соопшти дека ја засилува својата мисија во Балтичкото Море со испраќање на фрегата за противвоздушна одбрана и други средства, како реакција на упадите на дронови во Данска, јавува Reuters.
Данските вооружени сили соопштија дека во текот на ноќта се забележани неидентификувани дронови во близина на воени објекти, по неколкуте инциденти оваа недела во близина на аеродроми и критична инфраструктура. Аеродромот во Копенхаген, најпрометниот во северната Европа, бил затворен неколку часа во понеделник навечер поради појавата на големи дронови, а пет помали аеродроми, цивилни и воени, привремено биле затворени во следните денови.
Во соопштението на НАТО се наведува дека со новата акција ќе се спроведува поинтензивен надзор со „мултидимензионални средства“ во регионот. Новите средства вклучуваат платформи за собирање разузнавачки податоци, надзор и извидување, како и најмалку една фрегата за противвоздушна одбрана. Засега не се открива кои земји ќе придонесат со дополнителни средства.
Се претпоставува дека станува збор за фрегата од СТАЈНДИНГ НАТО МАРИТИМ ГРУПА 1 (SNMG1), која веќе е активна во Балтичкото Море, составена од модерни фрегати и разурнувачи од земјите-членки на НАТО. Овие бродови се опремени со радари со голем дострел, ракетни системи за одбрана од авиони, проектили и дронови, како и командни капацитети за координација на повеќе гранки на одбраната.
Засилената мисија ќе ја поддржи „Балтичката стража“, која од јануари го штити Балтичкото Море поради напади врз подморски енергетски кабли, телекомуникациски линии и гасоводи. НАТО исто така ја започна и мисијата „Источна стража“ за зајакнување на одбраната на источното крило на Европа поради упадите на руски дронови во Полска.
НАТО во вторник предупреди дека ќе употреби „сите потребни воени и невoени средства“ за своја одбрана по инцидентот со три руски борбени авиони MiG-31 во естонскиот воздушен простор. Русија ги оспорува овие тврдења и вели дека нејзините дронови немале за цел да нападнат во Полска. Рускиот министер за надворешни работи Сергеј Лавров предупреди дека „секоја агресија кон Русија ќе биде одговорена решително“.
