Рускиот претседател Владимир Путин подготвува ширење на војната надвор од Украина и планира напад врз уште една европска земја, предупреди украинскиот претседател Володимир Зеленски.
Во говорот во Киев, по средбата со американскиот претседател Доналд Трамп во Њујорк, Зеленски изјави дека Русија веќе ја тестира одбраната на НАТО со напади со беспилотни летала и нарушувања на воздушниот простор на европски земји.
„Путин нема да чека да ја заврши својата војна во Украина. Тој ќе отвори друг правец. Никој не знае каде. Тој го сака тоа“, рече Зеленски, пренесува „Гардијан“.
Според него, руските беспилотни летала биле забележани над Данска, Полска и Романија, а руски борбени авиони влегле во естонскиот воздушен простор. Само овој месец, Украина регистрирала 92 дронови насочени кон Полска, од кои 19 преминале на полска територија.
Зеленски порача дека европските влади мора да реагираат брзо и заеднички, додавајќи дека Украина е подготвена да го сподели своето искуство во одбивање на руските воздушни напади.
„Подготвени сме да им дадеме практична обука на нашите партнери за тоа како да се заштитат“, нагласи украинскиот лидер.
